ព្រះសីហនុ៖ សមាគមជប៉ុន-កម្ពុជា នាថ្ងៃទី១០ ខែកុម្ភៈ ឆ្នាំ២០២៣ បានផ្តល់ជូនដល់រដ្ឋបាលខេត្តព្រះសីហនុនូវរថយន្តពន្លត់អគ្គិភ័យចំនួន ១គ្រឿងដែលអាចបាញ់ពន្លត់អគ្គិភ័យដល់អគារដែលមានកម្ពស់ចំនួន ១៣ជាន់។
អភិបាលខេត្តព្រះសីហនុ លោក គួច ចំរើន និងលោក តាកាហាស្សិ ហ្វូមីអាគិ អតីតឯកអគ្គរដ្ឋទូតជប៉ុន ប្រចាំកម្ពុជា ដែលបច្ចុប្បន្នជាប្រធានសមាគមជប៉ុន-កម្ពុជា បានអញ្ជើញចូលរួមពិធីប្រគល់ និងទទួលរថយន្តពន្លត់អគ្គិភ័យជណ្តើរវែងដែលមានដៃប្រវែង ៣៥ម៉ែត្រ ដែលអំណោយរបស់សមាគមជប៉ុន-កម្ពុជាជូនដល់រដ្ឋបាលខេត្តព្រះសីហនុ នៅការិយាល័យនគរបាលចរាចរណ៍ផ្លូវគោកខេត្តព្រះសីហនុ។
លោកអភិបាលខេត្តបានថ្លែងថា ការផ្ដល់នូវរថយន្តពន្លត់អគ្គីភ័យជណ្ដើរវែង ១គ្រឿងនេះ ពិតជាមានតម្លៃមិនអាចកាត់ថ្លៃបាន ហើយរថយន្តពន្លត់អគ្គិភ័យនេះជាសម្ភារដ៏សំខាន់ក្នុងការអន្តរាគមន៍ពន្លត់អគ្គីភ័យ និងកាត់បន្ថយហានិភ័យនានាបង្កឡើងដោយអគ្គិភ័យក្នុងខេត្តព្រះសីហនុ។
ជាមួយនឹងវត្ថុដ៏មានតម្លៃនេះ លោក គួច ចំរើន បានណែនាំដល់កងកម្លាំងប្រដាប់អាវុធ និងមន្ត្រីសណ្ដាប់ធ្នាប់ សង្គ្រោះ និងពន្លត់អគ្គិភ័យត្រូវបន្តការយកចិត្តទុកដាក់គ្រប់គ្រងសភាពការណ៍ និងធ្វើការឆ្លើយតបជាបន្ទាន់ចំពោះគ្រោះអគ្គីភ័យដែលកើតមានឡើង។
ទន្ទឹមនោះលោកក៏បានណែនាំមន្ត្រីជំនាញត្រូវធ្វើការហ្វឹកហ្វឺនកម្លាំងបង្ការបស់ខ្លួនជាប្រចាំ ដើម្បីពង្រឹងគុណភាព សមត្ថភាព និងស្មារតីគ្រប់គ្រាន់ក្នុងការឆ្លើយតបទៅនឹងគ្រោះមហន្តរាយ និងគ្រោះហានិភ័យនានាដែលកើតមានឡើងនាពេលខាងមុខ៕
